Laissèm le Rotlar

"- z-Es partit de biais, crèse que vai capitar.
- A bon ?! Sès simple, quo se vei qu'aquo vai se chabar vès l'espitau.
- Non, non, sa partença z-èra benliau... un pauc... speciala, mas traça de biais, coma fau.
- Pense que vai pas capitar jusca a la fin, e si 'rriba, quo-es en mai d'un morcèl.
- Mas, de que te fai dire quo ? Sa trajectòri, per le moment, z-es la bona !
- Le chat.
- Le chat ?
- Òc-es, le chat de la vèlha. Sabes, 'quel chat rosset que miaula tota le ser.
- Me'n parlas pas, 'rribe jamai de dormir... Mas qun rappòrt 'bei sa corsa jusca en bàs ?
- Laissèm le rotlar, vas veire dins... Mmmmh... Tres segòndas."

E tres segòndas mai tard, un chat rosset 'rribèt en corrent, passèt davant la bicicleta que 'nava embei velocitat, se botèt endavant, e davant que le menaire de la bicicleta poguèt credar una creda de terror, le chat sautèt sobre le menaire e la bicicleta partiguèt en mai d'un morcèl de tot costats.

"- DE QUE ?! De que ven de se passar ?!
- Le chat.
- Comprène qu'aquo-es le chat, mas... Per de que ? E coma ?
- Aquel chat, quo-es pas un chat coma los autres. Quo-es un marines de l'armada americana. Annuèit, z-es a la retirada. Mas vès en bàs de la colina, n'i a son laboratòri secret.
- Me dises de las nhòrlas. 'Rrèsta te de te fotre de me.
- Non, non, quo-es vrai. E dònc z-es per defendre l'accès de'n bàs vès alai exactament, per çò que z-es de farjar una bomba atomica."

Mas davant que l'autre poguèt respòndre, le tipe de la bicicleta e le chat 'rribèton en bàs e le chòc de la tombada provoquèt una reaccion dins le còr nuclear, e la Tiarra explodèt.