Los Merchands d'Armas fan liur Merchat de Chalendas

"Mossur Dassault, mossur Dassault !"
Mossur Dassault z-èra dins son burèu de joar amé un avion en papèir.
"- Mossur Dassault !
- De que n'i a, bon brave Kevin ? ce demandèt mossur Dassault. Vèses pas que sèi franc ocupat ?
- Mossur Dassault, las ventas d'armas son en baissa, le monde aman pas la guièrra !
- Le monde aman pas la guièrra ? De qu'aquo-es 'quelas conarias ? La guièrra quo-es franc cool !
- Sabe, mas le monde son un pauc limitats...
- Bon, e de qu'as de me propausar per faire tornar montar las ventas ?
- Amatz Chalendas ?
- Per surat, tota le monde aman Chalendas !
- E ben z-anèm faire un merchat de Chalendas d'armas. 'Ma quo, le monde veiron ben que la guièrra quo pòt èsser festiu e franc cool !
- Bona idèia mon petit Kevin ! E ben té, vai m'organisar quo, z-aurà una promocion !
- Mercés mossur Dassault !"

A quòs mots, mossur Dassault contunhèt de joar amé son avion en papèir e de faire "pió pió !" amé sa bocha. Kevin, son sotz-director generau o sabe pas tròp de que, se'n anèt organisar tota quo.
Un mes mai tard, quo-èra quauquas setmanas davant Chalendas, se badèt dins mai d'una viala en l'estat de França un merchat de Chalendas de las armas. Quo-es coma quo qu'a costat daus tradicionaus vialatges comerciaus ente se pòt trapar daus chocolats tròp chars e de las merdas comercialas en plastica, se teniá daus Concòrdes, daus obús nuclear e autras joiosatats.

Sarà, cinc ans, passava per aquí amé sa familha per "veire Sent Nicolau", e "manjar chocolat". Mas quand veguèt aquel Mirage 2000 C en promocion -50% a costat de las bolas per le sapin, aguèt una revelacion. "Papa ! Mama ! Vòle avion ! Vòle pió pió sobre los palestinians que son los vrais terroristas !" Papa e Mama, per faire plaser a liur filha unica e per ce qu'avián ganhat au lotò faguèt pauc de temps, li chaptavan, e quo-es coma quo que Sarà, cinc ans, descolèt dau sòl, larguèt un obús nuclear en suplement amé l'avion, ce que provoquèt una guièrra nuclear e la tèrra explosèt.