Nau Sacs de Froment
(Queste poësia m'es venguda en escotant Nau sacs de hroment de Laüsa, d'una chançon tradicionala gascona)
La linga z-es venguda per iu, coma d'autres
La linga qu'en pèsa un sac de froment,
Li disiá qu'o portarai.
Me diguèton: "Sès colhon de parlar patoés !
Quo-es una linga dau passat, per las chançons e la chabreta."
Un sac de froment, e enquèra mai,
Nosautres diguetèm qu'o portarèm.
La linga qu'en pèsa dos sacs de froment,
Li disiá qu'os portarai.
Me diguèton: "Vòles pas revirar en francés ?
Comprenèm jamai ren dau tot, podèm pas ren legir."
Dos sacs de froment, e enquèra mai.
Nosautres diguetèm qu'os portarèm.
La linga qu'en pèsa tres sacs de froment,
Li disiá qu'os portarai.
Me diguèton: "Sès pas un indentitari tu ?
La linga de la libertat, quo-es le francés e ren d'autre !"
Tres sacs de froment, e enquèra mai.
Nosautres diguetèm qu'os portarèm.
La linga qu'en pèsa quatres sacs de froment,
Li disiá qu'os portarai.
Me diguèton: "Mas, quo-es mas una linga incomplèta !
Au mens, en francés, podèm tot exprimar sens problèmes !"
Quatres sacs de froment, e enquèra mai.
Nosautres diguetèm qu'os portarèm.
La linga qu'en pèsa cinc sacs de froment,
Li disiá qu'os portarai.
Me diguèton: "Pensas pas que sès un Don Quichòta ?
A t'espiar de batre, per una causa perduda, una causa de ren..."
Cincs sacs de froment, e enquèra mai.
Nosautres diguetèm qu'os portarèm.
La linga qu'en pèsa sèis sacs de froment,
Li disiá qu'os portarai.
Me diguèton: "Quo-es ben çò que fases, òc-es...
Mas vau pas aprendre, me'n fòte, mas dins l'idèia quo-es ben..."
Sèis sacs de froment, e enquèra mai.
Nosautres diguetèm qu'os portarèm.
La linga qu'en pèsa sèt sacs de froment,
Li disiá qu'os portarai.
Me diguèton: "Bon, m'agrada mai d'aprendre l'inglés.
Au mens, pòdes parlar 'bei dau monde, pas 'bei cinc retirats !"
Sèt sacs de froment, e enquèra mai.
Nosautres diguetèm qu'os portarèm.
La linga qu'en pèsa v-uèit sacs de froment,
Li disiá qu'os portarai.
Me diguèton: "D'accòrdi, quo-es per le torisme ooo ?
Sinon, per los finançaments, podètz anar cagar."
v-Uèit sacs de froment, e enquèra mai.
Nosautres diguetèm qu'os portarèm
La linga qu'en pèsa nau sacs de froment,
Li disiá qu'os portarai.
Me diguèton: "Sèi francés, parle francés, quo-es tot !
L'Auvèrnha z-es francésa tanben, pro de merdas de separatisme !"
Nau sacs de froment, e enquèra mai.
Iu me disiá qu'es pro, mas qu'os portarai.
Chamin de linga, liada a la vida,
Te faire chaminar z-es pas aisat,
En passant per picas e flamas,
Còntra le vent, la mar le mesprés e l'indiferencia,
Mas te portèm, linga, e te portarèm totjorn.
Sens espèrs, sens temonhs e sens presents.
Per çò qu'es çò qu'es de biais.
Per çò qu'un jorn, capitarèm.