11 Aquel qu'es salat

Descharjar l'istòria en version EPub (actualisada chasque jorn jusca la version finala)

Natan z-amava los pebrons. z-Amava tant los pebrons que chaminava per charrèiras amé un pebron que disiá qu'èra un "pebron de fisica". Quo-èra son pebron astrador, quand chaminava amé quo, se cresiá le rei dau monde, se cresiá que ren li podiá arribar. Natan z-èra un pauc estrange tanben. Pas n'arma li parlava dins le vialatge, z-èra le simple, le raví. Mas se disiá le bonjorn amé tota le monde, chasque jorn. Temptava de faire la discussion, maitot, mas quo-èra pas de bon comprendre, e le monde partissián liau liau.

Annuèit, coma chasque còp, tot eirós, Natan chaminava dins le vialatge amé son "pebron de fisica". Disiá bonjorn amé Bernat, totjorn completament fiaulat, disiá bonjorn amé Alban, qu'èra en retard, disiá bonjorn amé los tipes en irantge qu'èran novèls dins le vialatge, e que semblavan daus membres d'una sècta.

"- Bonjorn per vos, mossur, diguèt un tipe en irantge. Dijatz-me, ente podèm trapar la maison d'una Magdelaina ?"

Quo-èra le promèir còp dempuèi un brave moment que quauqu'un li disiá le bonjorn. E quo-èra enquèra mai le promèir còp que quauqu'un li demandava quicòm. Natan z-èra franc content. Mai que content. Botèt tota sas fòrças per faire la respònsa melhora que se pòt.

"- ...trapar la maison d'una Magdelaina... Magdelaina, diriá, informatica ! En rapòrt 'mé la copa dau monde de 1976, que se pòt èsser una mirja, una mirja, sabètz ? Iratnge, genta color, sètz Jarsalhon vosautres non ? Rencontrèt Jarsalhon 'mé Francés Lalana en-...
- D'accòrdi, d'accòrdi, mercés Natan, mercés. A reveire !"

Natan demorèt tot sòl, enquèra un còp. Mas au mens z-auriá pogut parlar amé quauqu'un annuèit. E son pebron li diguèt :

"E ben vèses, mon colhon, liur z-a pas dit ente z-èra la Magdelaina, viva per tu."