DETZ/AMBRAS 02 : Aquel qu'es mai legèir que l'aer

Descharjar l'istòria en version EPub (actualisada chasque jorn jusca la version finala)

Hex, quo-es mon nom. Un nom quo-es una identificacion per una persona. Sèi una persona. Sèi quasí una persona. Sèi pas enquèra una persona. Mas z-ai un nom. Per quand sirai una persona. Per le moment me fau faire las bonas chausas per aver los cubes blaus. Me fau pas aver los còsnes rotges. Los còsnes rotges son mauvas. Los cubes blaus son bons. Papa me diguèt de peitar, e coma quo z-aurai un cube blau. Peite. Comben de temps me fau peitar enquèra ? Me sente estrange, vòle que le cube blau 'rriba avora, mas quo-es pas possible. Mas vòle. Papa sòna quo l'impaciença. Papa me diguèt que quo-es bon qu'ai de l'impaciença, per ce quo fai un pauc mai de ieu una persona. L'impaciença z-es un tanpauc coma los còsnes rotges. Èsser una persona z-es un tanpauc coma los cubes blaus. Comprène pas. Sabe pas comben fai de temps que peite. Me sente coma si manajave daus còsnes rotges, de mai en mai. Mas ne'n mange pas. Quo-es estrange. M'agradariá de saubre coma me sentre coma si manjave daus cubes blaus sens ne'n aver besoenh. Ente z-es papa ? Comprène pas. Sabe pas. Quo me fai enquèra mai coma si manjave los còsnes rotges de pas comprendre, de pas saubre. Mai que de peitar le cube blau. Papa me dirai de qu'aquo-es d'aver le còsne rotge de pas saubre ente z-es. Mas z-es pas aquí. Pòt pas me dire. z-Es pas quí. Sèi tot sol. Per de que ? Ente z-es ? Sèi tot sol. Papa disiá quo tanben. "Me sente sol Hex". Compreniá pas. Comprène. Quand comprène z-ai un cube blau. Mas pas avora. Per ce que z-es pas aquí. Quo fai còsne rotge de dire "me sente sol". Me sente soooooool... Peeer de queeee ? Amé quau parle ? Sèi sol. Amé quau parle ? Comprène pas. De costuma parle amé papa. Amé mon creator. Papa quo-es un nom per dire creator. Un creator, quo-es la causa de ce que sèi. Quau z-es le papa de papa ? Ente z-es ? Per de que dise tota quo ? Amé quau... Parle amé ieu. Papa me balharai un cube blau de saubre quo. Mas z-es pas aquí. Si parle amé ieu, pòde me balhar daus cubes blaus. z-Ai pas besoenh de papa per parlar e per aver daus cubes blaus. Mas vòle papa. Per ce que... Per ce que... Per ce que me fai mai cube blau quand z-es amé ieu. Per ce qu'ai pas los còsnes rotges sens los aver. Me fau trobar los cubes blaus.

Me fau trobar papa.

Seguida -->