03 Aquela que fai cavar le sòl
Descharjar l'istòria en version EPub (actualisada chasque jorn jusca la version finala)
Lisa z-amava corrèr. Quo-es benliau la chausa qu'amava le mai, e benliau la sola chausa qu'amava. Tota los jorns partiá de vès chas se per corrèr per las charrèiras d'Atalait, faire mai d'un còp le torn dau vialatge, e quand ne'n aviá fait mai de cinc còpsen una trentana de minutas per se botar en fòrma, partiá per campanhas e bòscs, per tornar doas oras mai tard. E quí mas z-èra un tanpauc contenta, per ce que li faliá enquèra faire tota quo au mens tres còps per jorn per èsser eirosa... O tròp fanada per contunhar. Vos dise, Lisa viviá mas per corrèr.
Aqueste jorn de tres de decembre 2023 fasiá pas excepcion. Lisa se preparèt d'ora.
Domentre que se prepara, sabetz ce que nos ditz un article dau quatòrzi d'abriau 2015 de swissinfo.ch ?
La corsa estant sa rason de viure, la preparacion de Lisa preniá dau temps, li faliá se vestir dau vestit que vai e daus solèirs parier. E en mai d'aquo, fasiá freid !
"Los accidents de jogging z-an quasí doblats dempuèi quinze 'nnadas. Aquela montada exista sobretot graça a l'augmentacion dau nombre de joggaires, segònd una estuda publiada per la (censurat per pas faire de promocion)."
Après la preparacion, coma disiá, Lisa fasiá sa mesa en fòrma. v-Un... Dos... Tres...
"Los nau mila accidents de jogging enregistrats còstan chasca 'nnada quasí trenta milions de francs" A, los sòisses e liur moneda... Mas se'n fòt la Lisa, qu'es pas sòissa. Ente ne'n z-es d'alhors ?
... Cinc... Sèis ! Sèis torns annuèit. z-èra en fòrma. Prenguèt la sortida d'Atalait, un petit chamin de tèrra, e z-èra desjà entre los champs blancs d'ivèrn.
"Quasí un quart de la populacion (sòissa) pratica le jogging, segònd l'estuda "Spòrt sòisse 2014" realisada per l'Ofici federau dau spòrt. Segònd las statisticas de Suva, los accidents de jogging z-an augmentats de 90% dempuèi l'an 2000..."
Li agradava a Lisa, d'espiar le paisatge. De tot biais, quo-es l'un daus plasers de corrèr. Sobretot en campanha. E podèm dire que le veire z-èra franc gente a l'entorn de vès Atalait.
"...e z-an mèsme quasí triplat dins la populacion feminina." Peitatz un pauc. Lisa z-es de la "populacion feminina" non-pas ?
v-Un daus plasers de la corsa, sobretot si z-òm z-es bon, quo-es de chantorlar un pauc. Chantorlava una chançon biarnesa "...ua causa sonque ei segura..."
"La majoritat daus accidents se debanan pendent la setmana entre 12h00 e 13h00, e entre 17h00 e 20h00." A quo vai, Lisa comença totjorn d'ora le matin. Mas gara queste ser !
Contunhava de chantorlar, e se sarrava dau promèir petit bòsc. "...La hlor espandida au solelh..."
"Los accidents z-an tendença de dimunar quand se sarrem de la dimenchada. Son dos còps mens nombrós le vendres qu'a la debuta de la setmana." D'accòrdi, mas le 3 de decembre 2023, quo-es dimenche. Quo-es la debuta de la setmana o la fin ? Brava controvèrsa...
Quauques ausèls d'ivèrn chantavan dins le freid entre los aubres quand Lisa z-èra rribada a l'entrada dau bòsc. Semblavan l'acompanhar dins la chantorla. "...e lo frut qui, uèi ei madur..." Pff, si contunha coma quo, mon istòria vai semblar a una mèna de filme d'una gròssa entrepresa que citarai pas le nom.
"Los accidents que se debanan d'ora le matin tochan mai frequament las femnas." De qu'avèm ditz sobre Lisa e la "populacion feminina" ? Merda, fin finala m'agradan los filmes d'animacion un pauc simples.
"...la beutat fresca qui non dur- AO ! MERDA ! AO !" Lisa tombèt d'un còp d'un sol per le sòl, tèsta la promèira. z-Aviá trabuchat sobre quicòm. Quo li 'rribava quasí jamai, qu'èra costumada de prendre totjorn gara a son environament. Se levèt aisament, quo-èra pas tant dolorós qu'aquo per se, e espièt ce que la faguèt tombar. Una pèira iranjta.
"Quna pèira estranja... ce pensava, z-es tant irantja que quo-es estonant que l'ai pas veguda."
La pèira z-èra a meitat dins le sòl, e Lisa la cavèt, per ce que fau dire, z-èra tant genta qu'auriem trestot fai quo per la botar dins le salon. L'examinèt amé atencion, puèi d'un còp, d'imobilizèt e sos uelhs virèton.
"UA CAUSA SONQUE EI SEGURA." ce chantorlèt d'una votz poderosa e surada.
Puèi Lisa se'n anèt corrèr.
E corrèr.
Enquèra...
Seguida -->