06 Aquela que structura la vida

Descharjar l'istòria en version EPub (actualisada chasque jorn jusca la version finala)

Charlòta cherchava chasque ser los aliens en naut d'una colina d'Atalait. Qu'ivèrna o que plòia, en tota sasons, montava la colina per l'ora que le solelh s'èra escondut, amé son telescòpi, e espiava los ciaus. Essaiava d'enfin veire un OVNI, e mèsma, quau sap, de'n fotografiar ! Se disiá qu'amé un bon pauc de volontat, e statisticament, si lai nava tota los sers, trobarà. Quo fasiá dempuèi sos dotze ans que se disiá quo, siá cinc longas 'nnadas... Oèi, podèm dire qu'èra determinada. E d'annadas en annadas, sas metòdis, son equipament z-èran melhorats. Sens mai de resultats.

z-Aviá començat sens ren, mas sos uelhs e son amic de totjorn, Habian. Puèi obtenguèt una luneta astronomica per afecionats dau domèni per son aniversari, e quo fai dempuèi pas tant de temps que capitèt de chatar un telescòpi mai professionau, graça au sacrifiça de sas vacanças d'estiu dins un restaurant de montanha.

Queste ser, coma sovent mas pas totjorn, Habian la jonhèt, desalenat de la montada.

"- A... Aaaf... Adieu ! Pfff... Quo vai ? ce diguèt amé Charlòta
- Oèi e tu ? Totjorn ren de mon costat. ce li respondèt Charlòta
- Bòf, totjorn punit, e 'quós colhons de Niná e d'Oscar m'an enquèra fai chiar annuèit..."
- Enquèra ? Me'n vau liur en parlar deman.
- Mercés. Mas quo foncciona pas jamai. Te disan que van 'rrèstar mas contunhan enquèra.
- Sèi surada que son braves au fònd, e que van 'rrèstar !
- Moèi..."

Charlòta parlava amé Habian sens levar l'uelh de son telescòpi. Habian s'èra preparat un selon e de que manjar un pauc. Espiava Charlòta espiar los ciaus e virar, puèi virar de novèl per èsser surada que manquèt ren.

"- Se debana de las chausas estranjas a l'ora d'avora dins le vialatge... ce li diguèt Habian
- Ah ? N'i a pas daus aliens que son venguts ? Ni mai quicòm en relacion 'mé l'espaci ? ce respondèt, amé suspresa.
- Non-pas. Enfin sabe pas. La maison de Beranguièra que s'esclafèt sotz mai d'una tòna de borax sobretot. L'avèm pas trobada enquèra d'alhors. Tant mèlhs, quo-es 'na conassa.
- Benliau que z-es brava au fònd. Sabes pas, te fau pas dire de mau dau monde coma quo sens saubre.
- Benliau que z-es brava, benliau que Hitler z-èra brave tanben ! ce li respondèt Habian, en virant los uelhs.
- Quo-es pas ce que dise... Sabe ben que te fai chiar daus còps, mas pense que si li parlave...
- Per surat, ce le copèt, virant los uelhs de mai. Per surat...
- Espère que quo-es pas los aliens que faguèton quo. Espère que los aliens son braves maitot."

E per le promèir còp dempuèi cinc ans, un lum passèt liau per la colina d'en faça. "AQUí !!" ce credèt Habian, que Charlòta l'aviá pas vegut. Charlòta z-èra venguda completament excitada amé l'idèia d'enfin realisar son sunhe. Laissèt son telescòpi e corrèt vès la colina d'en faça. Habian la seguissiá amé difficultat. Le lum z-èra enquèra de bon veire. Charlòta contunhèt de corrèr coma per sa vida. Habian, darrèir, la vesiá pas pus. Quauquas minutas mai tard, 'rribèt en naut per jonhar son amia.

Charlòta z-èra clinada dessobre le fònt dau lum, qu'espiava amé atencion, pivelada. Habian se clinèt maitot.

"- Quo-es 'na... television ? ce demandèt amé Charlòta.
- 'Na television... Alien !! ce li respondèt. Espia un pauc, ten de las pautas.
- Òòò... Quo-es vrai. Sembla rompuda..."

La mèna de television difusava mas dau blanc, e sas pautas z-èran en metau. Charlòta sarrèt sas mans per la prèner.

"- NON ! De que fases ? Si quo-es per de 'rai alien, sabèm pas ce que pòt se passar ! ce li avisèt son amic.
- T'esmaia pas, quo fai dempuèi tant d'annadas qu'estudie los aliens, sabe de que faire." ce li rassurèt Charlòta.

Habian diguèt ren de mai e espièt amé paur son amia prèner la television misteriosa. La levèt en l'aer per l'examinar. E d'un còp, una faça simplista se dessenhèt sobre l'escran, e la television diguèt "Adieussiatz !" d'un biais joiós.

"- AAAAAAAA !!! ce credèt de paur Habian, davant de s'escondre darrèir Charlòta.
- Adieu ! ce respondèt Charlòta amé la television. Per 'na telè alien, parlas ben l'occitan tu...

- Sabetz ente z-es mon papà ?"
Seguida -->