07 Aquela qu'ajuda las plantas
Descharjar l'istòria en version EPub (actualisada chasque jorn jusca la version finala)
Ninà z-amava doas chausas dins la vida. Joar amé los juòcs vidèos e emerdar Habian amé son amic Oscar. Quand fasiá pas l'una, fasiá l'autra. Sinon quo-es que s'emerdava. E questa après meidia de dijòus, z-aviá pas cors en le licèu, e dònc z-èra vès chas se de joar. Quo fasiá mai de doas oras que joava, e veniá mas de recebre un messatge.
"A, Charlòta..." se diguèt. "Vai enquèra me faire chiar per Habian...", e oèi, quo-èra quo. Mandèt un autre messatge, per Oscar, per saubre si l'aviá recebut tanben. E li diguèt que oèi. Inventèt un novèl messatge d'excusas, que tornaran pas pus l'emerdar, e puèi tornèt joar.
Mas recebèt un autre messatge. "Enquèra ? Son bonas mas excusas !" ce pensèt.
Charl👽ta : Dalhors, trobetem arsera qcm de franc interessant
Voltz venir veire ?
Mandèt un messatge de novèl per Oscar.
Ninà : Ta mandat le msm messatge que pr iu ?
osca(r) : oei, nem veire ?
Ninà : Pr surat !
Charlòta e Habian los peitavan darrèir vès la glèisa dau vialatge, en un endreit un pauc escondut. Tenián un sac d'escòla que semblava clafit de quicòm.
"- Adieu, qu'aquo-es 'quel messatge misteriós ? ce saludèton Ninà e Oscar
- Vos dise avora, que me coneissetz, quo-es pas quicòm d'alien. Mas quo-es tant interessant ! ce liur respondèt Charlòta.
- Tu, que tròbas quicòm de tant interessant que los aliens, sès surada que te manipulan pas dempuèi l'espaça ? s'estonèt Oscar.
- Non, non, ane, vos fai veire !"
Pendant que Habian e Ninà se gitavan daus espiars nèirs de luenh, Charlòta sortiguèt dau sac una television amé pautas en metau. La pausèt per le sòl, e demandèt au monde de peitar.
"- Hex, Hex ! ce sonèt amé la television. Hex ! Pòdes te desvelhar, quo-es bon !
- Sès venguda completament fadada amé tos aliens ma paura Charlòta, s'estonèt Ninà. Parlas amé las telès avora...
- Peita un pauc colhona, ce li diguèt Habian d'una votz dura.
- E ben, vèses, quo-es se que m'emerda ! ce respòndèt Ninà amé Charlòta. Alòre 'rrèsta te de..."
La television se lumèt, se levèt sobre sas pautas, e faguèt pareissèr una faça sobre son escran. Puèi diguèt :
"- Bonjorn Charlòta bonjorn Habian ! Sèi content. z-Avètz trobat Papa ?
- Non, desolat, pas enquèra, ce respondèt Habian. Te presente Colhon01 e Colhon02.
- Habian ! Non, galeja, liurs noms son Ninà e Oscar.
- Ahaha, viva per vosautres dos, la galejada z-es bona. z-Avètz utilisat una IA per faire 'ta quo ? ce demandèt Ninà.
- Non, respondèt Charlòta. L'avèm trobat arsèra per 'na colina. Sembla perdut, e essaia de trapar son "Papa".
- Papa !
- Bon, vòlon se fotre de nosautres. Ane Oscar, se'n anèm."
Habian s'enervèt, e diguèt amé Charlòta qu'aviá rason, e que son daus colhons. Charlòta diguèt ren, e semblava trista, totparèir que Hex. Ninà e Oscar partiguèton.
Quauquas minutas mai tard, domentre que Charlòta e Habian ranjavan Hex dins liur sac, Ninà redolèt sens dire bonjorn, completament panicada e coma si veniá de corrèr le maraton de sa vida.
"- Osc... Osc... Pff...
- Òsca ?
- Non ! Pff... Oscar !
- Oscar de que ?
- Pff... Oscar s'es fait... Pff... Raptat !"
Seguida -->