08 Aquel que fai cremar las plantas

Descharjar l'istòria en version EPub (actualisada chasque jorn jusca la version finala)

Oscar se desvelhèt dins le nèir, amé dificultat. z-Èra completament ssucat, e sa tèsta li fasiá mau de chin. Essaièt de se levar, per saubre ente z-èra, mas capitèt pas. Sans mans z-èran liadas amé le sòl, aquel qu'èra freid e que semblava en metau. "Pff... Te sès enquèra fotut dins la gadòlha Oscar..." se diguèt amé monotonia.

D'un còp la lum ataquèt los uelhs d'Oscar, que faguèt mas una grimaça. Ausissèt au fònd una pòrta se badar, e un tipe rentrar per se botar davant se, sens dire mot. Pauc a pauc, que sos uelhs fuguèton costumats amé la lum, vesèt una fòrma irantja, puèi un òme vestit d'irantge, puèi una masca per bofar sobre la faça d'aquel òme, e enfin un triangle dessenhat sobre son vestit.

"- Adieussiatz. ce saludèt l'òme irantge. Le voiatge vos agradèt ?
- Bòf, respondèt Oscar, totjorn un pauc ssucat, m'agradariá mèlhs la classa promèira.
- Interessant. Quo-es dau coratge o de la lassor ?"

Oscar respondèt pas. Sarrava de meitat los uelhs e lutava per pas dormir. L'òme l'espièt coma per peitar sa respònsa, puèi faguèt un "Hm." e petèt los dets. Un autre òme, queste còp tot de nèir vestit, amé quauquas bendas irantjas, pareissèt davant la pòrta amé una brava pèira irantja, que le legidor comença de coneissèr. L'òme irantja prenguèt la pèira, e se janolhèt davant Oscar.

"- Vequí ce que peitèm de tu. Que prenhes la pèira.
- A bé mercés, mas pòde pas tròp 'quí, respondèt Oscar amé cinisme."

L'òme irantge petèt de novèl los dets per faire destachar Oscar. Li balhèt la pèira, e Oscar l'espièt amé question.

"- E dònc v'sautres, raptatz daus gojats de licèu pe' liur balhar de la calhassa ? ce demandèt Oscar.
- Pauc o pro, ...oèi. ce carculèt l'òme irantge.
- Sètz colhons un pauc, l'auriá 'gut prenguda vòstra pèira. Pas besonh d'me faire perdre dau temps 'mé vòstres plants stile James Bond.
- Hmm... Quo-es vrai quo... ce diguèt le tipe irantge, un pauc embestiat.
- Bon e dònc ? De que ne'n fase ? Podètz pas me tornar menar vès chas me ?
- ...
- E puèi sètz completaments colhons 'mé vòstres vestits 'quí, podètz pas vos vestir 'ma fau ?
- ...
- E pe' d'que portar 'na masca. 'Na masca ahaha ! Ahaha ! AHAHA ! AHAHAHAHAHAHAHA !"

Oscar s'esclafèt de rire. Tant que ne'n faguèt tombar la pèira. Darrèir sa masca, l'òme irantge se sufisèt mas d'un sorire. Mai Oscar risiá, mai son rire z-èra intensa. Tant qu'auriem pogut dire que podiá morir de rire. Los dos òmes partiguèton de la sala, laissant la pèira e Oscar rire ensem. Dins le corridor, un còp la sala barrada, s'ausissiá en mai de son rire daus còps fòrts còntra las parets.

"Aquesta metòdi z-es melhora mon brave, z-aviás rason. Au mens nos fasèm pas chiar d'anar persègre una fòla per los bòscs o de cavar cinc tonas de borax la nuèit."
Seguida -->