10 Aquel qu'es la lum dins la nuèit

Descharjar l'istòria en version EPub (actualisada chasque jorn jusca la version finala)

Nestòr ! Mon brave Nestòr, tu que sès le prodige, le mervelhós, le gardian, le consh de la comuna ! L'ora z-es grave, que tos administrats z-an grand besonh de tu. Ò, oèi, que z-an besonh de iu, liur brave, gente, erós. Liur papa, liur lum dins la nuèit. Nestòr ! De que se debana dins Atalait, Nestòr... De las desaparecions, daus fenomènes estranges... Ne'n i a pro !

Me'n vau, avora, 'nar quèrre la poliça, los gendarmes, per concentrar tota liurs fòrças per quo ! A... Mas sèm le menche. Bon, 'nirai deman, mas d'ora ! Quand z-aurai chabat de me lavar, penhar, e vestir per surat.

E si la poliça, los gendarmes, vòlon pas, menarai l'enquèsta iu ! E la rèsta dau conselh municipau pòt ben me'n desfendre que me'n desfendon, me'n fòte ! Pas ren z-es mai important que la se-cu-ri-tat daus braves atalaitaires. Coma dins los libres de Ganhaire, farai l'inspector dau vialatge. Le erós de son pòble. E benliau que faràn, quand sirai mòrt, d'una mòrt eroïca, per surat, una statua de iu per la plaça. Coma fan en viala amé le monde important. De tot biais, ne'n ai l'eime. Oèi, Nestòr, coma de costuma, vas capitar de batre las galipòtas que menaçan la vida de ton char vialatge. E en mai de l'eime, tène l'astre, amé quo.

Amé aquesta pèira irantja franc genta que m'ofrèt un amic.
Seguida -->